|
Kennarar úr Ölduselsskóla fá hvatningarverðlaun Menntaráðs 2009 ásamt Fellaskóla og Vogaskóla.
Sunnudaginn 14. júní voru nemendaverðlaun og hvatningarverðlaun menntaráðs Reykjavíkur afhent við hátíðlega athöfn í Ingunnarskóla. Kjartan Magnússon, formaður menntaráðs afhenti verðlaunin. Markmið með verðlaununum er að veita nemendum og grunnskólum í Reykjavík jákvæða hvatningu í starfi og vekja athygli á því gróskumikla starfi sem fram fer í grunnskólum Reykjavíkurborgar. Auk þess að stuðla að nýbreytni- og þróunarstarfi í skólunum. Tuttugu og átta verkefni voru tilnefnd og þar af voru átta verkefni valin til viðurkenningar. Ölduselsskóli var einn þriggja skóla sem fékk viðurkenningu og verðlaunagrip eftir Pjetur Stefánsson fyrir verkefnið Vinnustöðvar í lestri.
Síðastliðið sumar fóru nokkrir kennarar skólans til Texas í Bandaríkjunum að kynna sér ákveðið námsfyrirkomulag kennt við Debbie Diller sem stuðlar að einstaklingsmiðuðu námi með vinnustöðvum. Áður höfðu þessir kennarar kynnt sér bók og myndband sem Debbie Diller gaf út.
Kennararnir Ásdís Hallgrímsdóttir, Erla Erlendsdóttir, Ásta Margrét Guðmundsdóttir, Kristín Gísladóttir, Eygló Guðmundsdóttir, Guðrún Guðnadóttir, Björg Ásgeirsdóttir, Guðríður Guðnadóttir, Málfríður Jóhannsdóttir og Elín Thorarensen fóru til Texas á námskeið til Debbie Diller. Eftir heimkomuna fylltust þessir kennarar eldmóði og hafa núna í vetur verið að þróa það sem þær kalla vinnustöðvar í lestri og fengið til liðs við sig fleiri kennara úr kennarahópnum.
Við í Ölduselsskóla erum afar stolt af frumkvöðlum okkar og óskum þeim til hamingju.
Hvatningarverðlaun menntaráðs Reykjavíkur 2009:
Viðurkenningarskjal ásamt verki eftir Pjetur Stefánsson, komu í hlut eftirtalinni skóla:
- Ölduselsskóli - fyrir verkefnið: Vinnustöðvar í lestri
- Fellaskóli - fyrir verkefnið: Foreldranámskeið fyrir erlenda foreldra
- Vogaskóli - fyrir verkefnið: Jafnréttisfræðsla í leik- og grunnskólum
Sérstök valnefnd, skipuð af fræðsluráði, fjallaði um allar tillögurnar en formaður hennar var Sigríður Ragna Sigurðardóttir. Til hliðsjónar við valið hafði dómnefnd vinnureglur en þar segir m.a.:
Með nýbreytni er átt við nýjung í skólastarfi viðkomandi skóla sem felur í sér umbætur á skólastarfi. Þar segir einnig: Þróunarstarf er skipulagt starf sem leiðir til framfara í skólastarfi. Dómnefnd skal leitast við að veita viðurkenningu fjölbreyttum verkefnum hvert sinn.
Ísak Bjarnason nemandi í 10. bekk fékk Nemendaverðlaun Menntaráðs
Nemendaverðlaun menntaráðs eru nú afhent í sjöunda sinn, en síðan vorið 2003 hafa árlega verið veittar viðurkenningar og verðlaun til nemenda í grunnskólum borgarinnar sem skara fram úr í námi og starfi. Tilhögun þessara verðlauna er þannig að skóli tilnefnir nemanda eða nemendur til nemendaverðlauna og sendir upplýsingar til valnefndar. Alls bárust að þessu sinni 36 tilnefningar frá 33 grunnskólum í Reykjavík um nemendur sem skara fram úr í námi, í félagsfærni, virkni í félagsstarfi eða hafa sýnt frábæra frammistöðu á tilteknu sviði skólastarfs.
Nemendur sem tilnefndir voru fengu bókargjöf og viðurkenningarskjal. Verðlaunahafar spanna nánast alla aldurshópa grunnskólans.
Ölduselsskóli tilnefndi Ísak Bjarnason nemanda í 10. bekk fyrir frábæra virkni í félagstarfi og óeigingjarnt starf í þágu skólans.
Rökstuðningur fyrir tilnefningu hans var:
Ísak á heiðurinn af því að árshátíðarleikrit skólans varð eins og atvinnumannasýning með tölvuvæddum ljósabúnaði og hljóðkerfi auk reykvéla. Ekkert verkefni virtist honum óyfirstíganlegt. Ekki einungis lagði hann af mörkum ótrúlegt vinnuframlag heldur aflaði hann styrkja sem voru bæði beint peningaframlag frá fyrirtækjum auk þess að fá með sér fólk til aðstoðar sem kunni vel til verka. Með þessu þrekvirki gerði hann skólanum kleift gera sýninguna á söngleiknum Hárinu að ógleymanlegu verki í sögu skólans.
Innilega til hamingju Ísak. |
