Í Ölduselsskóla er starfrækt öflugt foreldrafélag. Allir foreldrar og forráðamenn nemenda í skólanum eru félagar og stjórn félagsins er skipuð breiðum hópi fulltrúa þeirra. Aðalfundur er haldinn að vori og eru allir foreldrar og forráðamenn boðaðir á hann. Í aðalfundarboði er stillt upp hópi fólks sem býður sig fram í stjórn sem kosin er á fundinum. Ekki er kallað eftir framboðum á staðnum.

Hlutverk foreldrafélags Ölduselsskóla er að styðja skólastarf, stuðla að velferð nemenda og efla tengsl heimila og skóla. Starf foreldrafélagsins byggist á skipulögðu samstarfi foreldra/forráðamanna nemenda í hverjum bekk og skólans. Stjórnin fundar reglulega einu sinni í mánuði og oftar ef ástæða er til. Félagið starfar eftir reglum sem kveða meðal annars á um kosningu í stjórn félagsins og kosningu fulltrúa í skólaráð. Ef foreldrar/forráðamenn vilja koma málum á framfæri við stjórnina er hægt að hafa samband með tölvupósti eða símleiðis.

Tveir eða fleiri bekkjarfulltrúar eru valdir úr foreldrahópnum í hverjum bekk og er hlutverk þeirra m.a. að halda utan um bekkjarstarf í samráði við kennara og með þátttöku annarra foreldra og mæta á aðalfund foreldrafélagsins.

Foreldrar hvers árgangs fyrir sig eru með foreldrasíðu á Facebook sem er hugsuð sem upplýsingaveita og vettvangur til að skipuleggja foreldrasamstarf.